Nog meer rijme-larie
De oalde hane
De oalde haan in’t kippenhok
Had et volgens hum allennig veuls te drok.
Vreug an zien baas um assistentie
Wilde iedre weke graag drie dagen wat clementie
Kan dat niet dan trek ik mi-j wel helemoale trugge
Mar niet ai-j mi-j goat slachten, dat giet mi-j iets te vlugge
De Riest
Het begin is smal en diepe
Is in de lente en de zomer
Rustig en kalm
Mar in de harfst en in de winter
Breed en woest,
grommend as een biest
Sleurt vlonders en bruggies met
Zodat de overkaante van die Riest
Onbereikbaar is
Speenvarken
Jonges luster is,
zo’n varkentie
an’t spit
dat is niet mis.
Een stukkie van de rechterbil
en doar een honingsauzie op.
dan is et volkie heel gauw stil
eet de vingers d’r_ hoast bi-j op.
Een skale met een zalmsalade
verdeelt ze ök eem onderling
en uurtie later smeekt ze_um genade,
Want heur broek die stiet op spring
Wat hebt ze et toch onwies goed.
Gien last van onger dust of koalde.
De meest’n zit toch goed bi-j bloed.
Bint noa een nachie sloap’n weer de oalde.
Kiek’n noar mien kleinkind
Ik keek veuruut, ik keeke rond
Ik keek noar boom en noar de grond
Ök keek ik rechts en ök noar links
O, bin ie doar mien kleine sphinkx
Dan loop ie hier en dan weer doar
Een felrood knippie in oen hoar
Ie lacht noar iederiene die ai-j kent
Bezorgt die een geluksmoment.
Oen vroag’nde oogies kiekt mi-j an
Toe nöw, pak mi-j eempies dan
Mag ik op oen knie kom zitt’n?
Eem later lig ie op mien skoot te pitt’n.
Wat grui ie toch verskrikkelijk hard
Ik bedenke dit, met iets van smart.
Het giet mi-j allemoal te vlugge
Want zo’n moment komt noot meer trugge.
Brummelbos
Wanneer de brummelbossies bluit
Een merel lokkend lovesongs fluit
Et grune grÓ§s op et heulaand gruit
Krentebossie met heur bloempies pronkt
En roekend noar de bi-jgies lonkt
Het wilde zwientie sloapend ronkt
Goa dan eem kuiern in et veld
Woar allend de rust mar telt
Ni-jschierig zich een eekhoorn meldt
“t Water in een bekie kabbelt
Haze op een wortel knabbelt
Vissie an een wormpie sappelt
Blief dan wel lopen op het pad
Aanders lig ie zo mar op oen gat
Want ‘d heide is nog nat en glad
Goa ie dan opgewekt noar huus
Een zeilboot schut ze in de sluus
Nog eem dan bi-j weer lekker thuus
Zit dan weer lekker in et vel
Een koppie koffie smaakt dan
Wonderwel
De akster en de kraaie
Een bonte akster en een kraaie
Keken stiekem noar mekaar
De akster dacht: da’s niet zo’kwaaie
De kraaie: zo’n akster is nog niet zo raar
De akster hupt is wat in’t ronde
De kraaie stapt heel deftig voort
En op de vogelties rontonde
Kwaam ze saam tot een akkoord
Zij zweurn mekare eeuwig trouw
Van 12 uur tot s’middags late
Wat bleek, de kraaie die had al een vrouw
De akster had een spiegelende plate
Ze vleug’n toen noar hun eigen boom
Mar van avontuurn krieg ie wel düst
Namen een slokkie um wat bi-j te koom
En kreupen toen in’t eigen nüst
Mien kleindochter
Zij kletst en snatert, as zij veur de telefoon giet stoan.
Zij kwettert vake honderd uut.
Ik kan d’r echt niks van verstoan
Veur mi-j klink’t as een carillon, een machtig mooi geluud.
Zwatte katte
Wi-j hadden thuus een zwatte katte
Die gung vÁak in ‘t duuster weg
Oons Fikkie miste hum dan arg
En was dan dagen an de latten.
Kwam oonze katte weken later weer
Met een royaal stuk uut een oor
Een potie vreeslijk onder bloed
Mar dan blafte vrolijk oons Fikkie weer
Maak jouw eigen website met JouwWeb