Ni-je viswinkel

 

Gait Harms had heurd dat er an de markt an de Dedemsvoart een viswinkel was è-koom. Volgens de luu met goeie vis.

Veural de ni-je hering wörn op è-pocht. En Gait heul barre veule van vis. Hij nam zich veur um doar zo gauw mogelijk is eem de neuze umme de deure te stikken. Hij was nöw al op leeftied en gung in tegenstelling van eerder niet zo barre vake meer vissen. En et vang van vis gung hum ök al niet meer zo goed of.

 

Eerder gung ze vake met z’n drieen of met z’n viern vake noar de Noord-Oost polder um te vissen. Dan gung ze een hele dag en dan mus d’r natuurlijk flink profiand met è-neum wörn. Dreuge worst was er altied bi-j. Kauwt makkelijk weg. Noast heur visgerei wat goed op orde was zorgden ze d’r ök wel veur dat ze gien koalde of honger leden. Een gasstellegie um wat op warm te maken of te bakken beheurde ök al joarn tot de vaste uutrusting van heur visspuln.

 

Toe ze alle viere ongeveer teglieke met pensioen gung hebt ze saam ök een een apparaat an è-schaft woar ze paling mar ök wel andere vis in kun roken.De rokeri-je deun ze an’t water want de vrouwn woln het gestink niet in huus hem. En as ze ‘s aoms op huus an gung naam ze onderweg ök nog wel is eem een gehaktballegie van aanderhalf oons, tot heur, want van zo’n hele dag an’t water zitten krieg ie zin an wat.. En zo verstreken de joarn wel plezierig. Mar an alles komp een einde zo ök an’t koppeltie vissers. Toen de eerste ofhaoken zeen de aanderre drie dat ze toch nog wel een moal of wat een keer weer an’t water woln zitten. En dat zul Wiecher ök vaste wiln hem dat ze dat zuln doen.

 

Toen kreeg Derk het in de botten en de spiern deun hum zeer as hij lange in iene hoalding mus zitten. Hij gung allennig mar met as ze niet zo verre van huus gung. Toen zien rugge helemoale niet meer wol is Derk è-stopt met vissen. Hij hef al zien spullegies wege-doane en gien visakte meer è-neum veur et joar doorop. Een moand of wat later is Derk overleen. En toen waarn er allennig Gait Harms en Jans Venebarg over. Dat stelde as vismoaten niks meer veur want Jans zien vrouw was ziek en Jans was doar zien tied veur neudig. Een heel enkele keer as een aander op zien vrouw wol letten kun hij nog wel eem van huus as et niet te verre was. Zo bloede dat koppeltie vissers vanzulf dood.

 

Toen Gait Harms, hij was vrögger bakker en later makelaar è-west heurde van het viswinkeltie was hij al gauw ien van de klaanten. Hij had in gien joar’n vis è-kocht umdat ze dat met z’n viern zulf altied verzorgn. En ök gien idee wat de vis op dat moment koste. Er lag paling in de vitrine te glim en et water leup hum in de mond. Toen hij an de beurte was zee hij dan ök: doe mi-j maar een bossie paling. Et meisie legde wat paling op een papiertie en vreug of dat genog was. O, laange niet doe er nog mar twee van die porsies bi-j. Ik heb elf kinder en doar bint er al wel een paar van de deur uut mar de rest lust echt wel wat. Het meissie keek al wat vrömd zo’n bulte paling had ze an een partikulier vandage nog niet verkocht. Ze legde de paling op de weegschale en zee dat is viem-vieftig euro viemzeumtig.

Gait verscheut van kleur. Zoveule kreunde hij. Hoeveule de kilo kost die ding dan? Zeum dartig en half de kilo. As ik an mien vrouw vertelle wat dat possie kost jag ze mi-j d’r met weer umme. Leg mar weer weg. Wat kost gerookte makreel vreug Gait. Zeum en half euro de kilo. Doe mi-j mar twee kilo want ik wil toch vaandage oen vis pruum.Gait betaaln en gung met een raar trekkie um zien gezichte de winkel uut. On geleufelijk bromde hij nog wat noa. Vrogger vung wi-j ze en rookten ze zülf en wat er over was naam wi-j met noar huus. Over geld worde er nooit proat.

 

 

Alles goed?

 

En dat allemoale halfweg de decembermoand 2016. Ik leup een kennis tegen et lief en die vreug: “Alles goed”?

Dat vrüg Hij altied as ik hum spreke. Natuurlijk is alles niet goed ai-j viemzeumtig joar bint, mar dat hoef ik toch niet altied te verteln. Ik heb doar dikke zat van zulke domme vroagen. Hij kan toch ok geoon vroagen Hoe is et er met. of, bi-j oarig goed et passe? Ik dacht ik zal hum is een keer een antwoord geem zodat hij direct niet weer vrüg, alles goed? Doar kwam bi-j dat et niet te warm was um buten te stoan proaten. “Zal ik oe verteln. Nee, niet alles is goed”. Toen heb ik et volgende ri-jgie op è-neumd.

 

Oonze hond is weggelopen, de boot meuk water, de caravan kreeg onderweg noar de sni-j een lekke baand, de kippen legden hoast niet meer, de oaldste van de kleinkinder hef een bien è-breuken, ien van de aandern brak de gebitscorretiebeugel, en völ de taand deur de lip. De auto wol een paar keer niet starten, de geiser gaf gien warm water meer, de verwarming bleef koald, de deure van de vriezer was lös bliem stoan, et hele spul dooi. Deur het bedde zakt. Weer thuus van de wintersport constateern dat er was in è-breuken en de riolering was verstopt. De poes had jong è-kreeg’n, de tillevisie mus een klap hem en aanders deud dat ding et niet. En wat denk ie nöw is’t wel genog.

 

Ie mussen is weten. Ik zag wel dat mien kennis in de gaten kreeg dat ik um veur de gek heuld. En gung ik verder, de wasmachine rateln en heuld toen op. De stofzoeger zeug bijna niet meer. Kun niks besteln via internet want de computer wol niet meer opstarten de printer deud zonder papier ök niks. De radio deed het mar op iene zender, allemoale karstliedties. Ik wus niet, zee ik teeg’n de kennis dat wi-j zoveule apparaten hadden die kapot kun goan. Ik dürm hoaste niet meer noar de garage want doar heb ik ök nog een boel spul wat de geest kan geem.

 

In alle winkels klunk, “we wish you een merry chrismus” uut de luidsprekers. Ja zul wel. Toen ik zoverre was had ik wel deur dat de kennis genög van mien geklaag had en weg wol want het was toch wel fris buten. Hij was inmiddels al een paar passen weg è-lopen. Ik reup hum nog noa, “Toch de moed er mar in hoaln, het wordt vanzulf wel een keer goed weer. As de zunne dan weer schient vergeet wi-j alle ellende van disse moand zo gauw mogelijk.

En in et ni-je joar rolt alle goeie ding misschien wel op oons an, inplaase van oons of”. Hij biende weg. Ik denke dat hij niet meer zo gauw zal vroagen of alles goed is.