Doarnoast ku-j ai-j dat wilt biljarten, kaarten, woaronder ӧk et sjieke bridgen woarvan ik allen mar kenne dat ze kaarten in kissies hebt zitten.

En dat weet ik ӧk nog umdat ze indertied mi-j is è-vroagd hebt van een bridgevereniging of ik heur kissies wol maken veur de club. Dat is nӧw zowat veertig joar geleen en dezülfde kissie bint nog in gebruuk bi-j die vereniging. Of ik heb barre goeie kissies è-maakt of ze hebt ze weinig gebruukt. Wie et weet mag et zeggen. In ieder geval ze bint nog in gebruuk en heb ik wel ere van mien wark had. Eem tussen deur , ik heb er nog gien deuzie sigaarn die ik toen nog rookte veur had. Et was niet zo veule mar ik heb et materiaal ӧk zülf nog betaald. Toen ik ze kloar had heb ik de kissies op een plekke kloar è-zet woar ze ze makkelijk op è-haald kun worn as ik niet aanwezig was. Ze waarn later wel ophaald mar een vroage over wat kost dat en een bedaankie mut nog koom. Doarumme wil ik dus ok niet bridgen.

Ach zulke ding gebeurn wel vaker. Joarn geleen komp op zekere dag enkele moanden veur koninnedag de middenstandvereniging met een delegatie onder aan voering van de wethoalder, die ӧk een winkel had, bi-j mi-j in de skoele um te proaten over een project woar mien leerlingen volgens de delegatie ӧk nog wat an hadden. Het bestuur van de middenstandsvereniging had bedacht umme alle skoeln van et basis-onderswies in de gemeente drie paar loopstelten zullen geem. Dan kun de kinder oefen in het kader van koninginedag veur spellegies uut verleden. Doaran gekoppeld hadden ze bedacht dat de leerkrachten van de ambachtskoele d’r wel wies met zuln wezen dat de timmerleerling een klussie hadden woar ze de gemeenschap ӧk nog met van dienste kun wezen en dat ze doar toch wel trots op kun wezen. Ze zuln et materiaal wel betaaln natuurlijk. Dat een skoele met veule leerling net zoveule stelten zuln kriegen as een skoele met weinig leerling en dat dat niet helemoale in de hoak was heb ik gien gewag van è-maakt. Want dan mus ik er waarschijnlijk nog meer maken.

Nou zulke klussies passen mi-j helemoale niet. Loat nӧw die wethoalder ӧk nog de portefullie van onderwies in zien pakket hebben en doordeur ӧk nog de veurztter van oons skoelbestuur. Ie snapt et al, weigern was er niet bi-j. Toen et klussie kloar was vreugen ze mi-j of ik saam met de veurzitter van de middenstandvereniging de loopstelten an ien van de skoeln officieel uut wol reiken. De doatum en tied op een woensdagmiddag was gelukkig al bepoald. Leut ik nӧw net niet kun, ik had al argens veur de skoele een ofspraak die ik niet of kun zeggen. Die drinkbeker is dus an mi-j veurbi-j è-goan, al mus ik wel zien dat ik argens een ofspaak mus zien te kriegen veur die woensdagmiddag.

Toen ik later de rekening indiende kwam de vroage of et ӧk zonder BTW kun. D’r stund er niet iens BTW op de rekening. Wi-j hebt niks met de BTW te maken zee ik tegen de penningmeester van de middenstandsvereniging. Veur de belasting bint wi-j gewoon een partikulier zonder bemuiennis van de ”kamer van koophandel”. Hij vund dat mar vrumd dat een skoele dat niet had. En hij wol ӧk nog eem weten woar dat freesie van twaalf gulden veur was dat op de rekenig stund. Toen hij uutleg è-kregen had wol hij et stompe freesie wel graag met hem. Want dat hadden ze toch betaald en misschien kwam het nog wel iens te passe.Dai-j dat frezie in de toestand van scharpte niet kun gebruken heb ikhum mar niet verteld. Ie begriept et al wi-j hebt gien cent of iets in natura veur het wark veur de skoele kregen. Ik heb nooit weer wat veur die middenstandsvereniging è-maakt. Ik was zogenaamd altied veuls te drok bezig umme de leerlingen veur het examen kloar te stoom. Inmiddels was er een aandere wethoulder van onderwies die gelukkig gien winkel had. Ik heb overigens nooit begrepen woar de name ‘middenstand’ weg è-koom is.

Wat bin ik een einde van mien onderwarp of è-dwaald. Ik wol verteln, hoe as ie vrouwn makkelijk an de proat kunt kriegen.

Toen ik een weke lang in et ziekenhuus had è-legen was et wel op è-valn dat ik er een paar keer niet was en die vrouwn woln weten wat ze met mi-j è-doane hadden en of dat nӧw beter was. Ik verteln heur dat ik de slagaders in de liesen verstopt had en dat ze die lӧs è-maakt hebt. An de rechterkaante hebt ze mi-j è-dotterd mar links kun dat niet. En mussen dus in de lies opereern. Toen ik uut et zienhuus noar huus mug zee de zuster tegen mi-j dat ik er wel een skoon verbaandtie op mug doen as et neudig was. Ik mus doorveur wel eem noar de apotheek want pleisters van zo’n 25 cm heb ik niet alle dagen in huus. En doar was et net natuurlijk hartstikke drok.

Toen ik an de beurte was vreug ik de assitente um lange pleisters. Hoelang vreug ze. De lengte van een keizersnee schat ik, zee ik. Mar ik weet niet hoe lang een keizersnee is, zee dat arme wichie met een rooie kleur. Ik zal wel eem wat pakken. Ik heurn al wat gegrinnik achter mij. Toen ik de langste uutkeus leek mij et nog an de korte kaante mar ik zee as et neudig is doe ik er wel een stukkie bi-j an. Toen ik dat an de koffietoafel vertelde dat er wonde zat, zo groot dat er wel een bevalling deur kun en dat et gelukkig een centimeter of tiene links van et midden zat, was et hek van de dam. Allerlei verhaaln over soorten bevallings vleugen over de toafel. De iene had heel lange met weeën è-lopen, een aander nog langerderder.

D’r was er ok nog iene die in de auto et kind è-kregen had op weg noar et ziekenhuus. De snelste had een nog starker verhaal. Ze wus niet dat ze in verwachting was toen et kind kwam. Ze wus wel van wie et mus wezen. De oamd doorveur had ze nog met de volleybaltraining met è-doane.

Ien van de vrouwn an de toafel, gemiddeld waarn ze zo’n viemzeumtig joar, vund et gemartel umme kinder te kriegen mar niks en vund dat ze an iene ӧk wel genog had. Een aander markte ӧk nog op dat as keerls kinder mussen kriegen de Chinese regering gien richtlijn over geboortebeparking uut hadden hoefen of te kondigen. Want dan was er nooit meer dan ien kind in et gezin geboorn. Zo ku-j met een opmarking een aantal vrouwn an de proat kriegen, as ie et goeie onderwarp mar ankaart. Mar dat kinder kriegen er wel in hakt is dudelijk want ze wussen alle details nog over die gebeurtnisen. Ik heb mi-j verder mar stil hӧln, mien keizersnegie stelde niks meer veur.